dekha jo ek shaḳhs ajab an-ban ka
ik silsila sa rahta hai har-vaqt dhyan ka
be-soche-samjhe ghar se jo yunhi nikal paḌe
ab DhunDte hain saaya kisi sa.eban ka
koi nahin hai aisa ki apna kahen jise
kaisa tilism TuuTa hai apne guman ka
basti men hain pa aise ki sab se juda hain ham
achchha tha ḳhabt ham ko bhi unche makan ka
mauj-e-nafas ke saath rahe rishta-e-ummid
dhaḌka sa varna rahta hai har-vaqt jaan ka
zalim ḳhuda se Dar kahin bijli na gir paḌe
mushkil bahut hai girna agar asman ka
jis ghar men hanste khelte guzri hai ek umr
rishta bhi ab to yaad nahin us makan ka
nakamiyon ko ham ne muqaddar bana liya
ab Dar nahin raha hai kisi imtihan ka
‘nadir’ vo kab balaon ko ḳhatir men laate hain
rakhte hain jo bhi hausla unchi uḌaan ka
Leave a Reply