khumar-barabankavi

Mujhko Shikast-E-Dil Ka Maza Yaad Aa Gaya

mujh ko shikast-e-dil ka maza yaad aa gaya

tum kyuun udaas ho gae kya yaad aa gaya

kahne ko zindagi thi bahut mukhtasar magar

kuchh yuun basar hui ki khuda yaad aa gaya

vaaiz salam le ki chala mai-kade ko main

firdaus-e-gum-shuda ka pata yaad aa gaya

barse baghair hi jo ghata ghir ke khul gai

ik bevafa ka ahd-e-vafa yaad aa gaya

mangenge ab dua ki use bhuul jaaen ham

lekin jo vo ba-vaqt-e-dua yaad aa gaya

hairat hai tum ko dekh ke masjid men ai ‘khumar’

kya baat ho gai jo khuda yaad aa gaya

More Poems

Leave a Comment