Saurabh Shekhar
sanjidgi ki ḳhaas zarurat to hai nahin
afsana hai ye ziist haqiqat to hai nahin
adna sa ek da.era hai ishq-o-uns ka
is dil men asman ki vus.at to hai nahin
ik soch hai zara si miri tum se muḳhtalif
kuchh meri tum se zaati adavat to hai nahin
bazar se hai sab ko munafe ki hi gharaz
par sab ke paas tarz-e-tijarat to hai nahin
us ne zarur kar liya iqbal jurm ka
lekin nazar men us ke nadamat to hai nahin
likkha hai thoḌi naam kisi ka havaon par
ye dhuup bhi kisi ki virasat to hai nahin
‘saurabh’ tujhe ye ḳhauf hai rusva.iyon ka kyuun
aisi tiri samaj men izzat to hai nahin
Leave a Reply