abdul-aziz-khalid

Qurb Nas Nas Mein Aag Bharta Hai

qurb nas nas men aag bharta hai

vasl se iztirab badhta hai

main faqat ek khvab tha tera

khvab ko kaun yaad rakhta hai

aaj ki shab shab-e-qayamat hai

dil mira be-tarah dhadakta hai

faqr kya hai ba-dost pevastan

gham ka irfan hai agahi kya hai

main milata huun sher-o-atish ko

fan mujhe kimiya ka aata hai

tosha-e-rah-e-ishq hai andoh

gham dilon ko qarib laata hai

sher-e-taza hai tohfa-e-shaer

mushk-e-nafa hiran ne ugla hai

qillat-e-kulfat-o-takalluf men

rahat-e-qalb-e-na-shakeba hai

aish-e-na-paedar par nazan

aadmi kitna bhola-bhala hai

jaan ka sarfa ho to ho lekin

sarf karne se ilm badhta hai

kise pas-e-maratib-e-alfaz

hashr-e-maani se qatl barpa hai

pa ke ghafil kahin na Das le tumhen

Daro us se jo tum se Darta hai

maqsad isbat-e-zat hai us se

kya gale ka sabab bhi hota hai

sachche takhliq-kar ki manind

unghta hai khuda na sota hai

ab-o-rang-e-hayat hai us se

aarzu jagton ka sapna hai

mere maula-karim ne mujh ko

ghair-matbua zehn bakhsha hai

yuun lage jaise parda-e-simin

aankh kya ruuh ka daricha hai

kis ne dekha hai parda-e-zulmat

dil ke bhedon ko kis ne paaya hai

kaun mar kar dobara zinda hua

kaun mulk-e-fana se lauta hai

kar ke yaksar mujhe nazar-andaz

kis se dil ham-kalam rahta hai

bavajud-e-fishar-e-shab hama-shab

husn har sub.h taaza hota hai

har bun-e-mu bana hai parda-e-saz

dil ke taron ko kis ne chheda hai

baat abdul-aziz-‘khalid’ ki

dastan-e-amir-hamza hai

More Poems

Leave a Comment