dil men tire jo koi ghar kar gaya
sakht muhim thi ki vo sar kar gaya
vahm-e-ghalat-kar ne dil khush kiya
kis pe na jaane vo nazar kar gaya
ja hi bhida tujh saf-e-mizhgan se yaar
dil to mira zor-e-jigar kar gaya
raat mila tha mujhe tanha raqib
yaar khuda ka hi main dar kar gaya
faiz tire vasf-e-buna-gosh ka
apne sukhan ko to guhar kar gaya
dekh li saaqi ki bhi dariya-dili
lab na hamare kabhu tar kar gaya
kyuun ke karahun na shab o roz men
dard mire pahlu men ghar kar gaya
nafa ko pahuncha ye tujhe de ke dil
jaan ka apni men zarar kar gaya
aur ghazal ab koi sauda tu kah
ye to yunhi thi main nazar kar gaya
Leave a Reply