kis havale se mujhe kis ka pata yaad aaya
husn-e-kafir ko jo dekha to khuda yaad aaya
ek tuuta hua paiman-e-vafa yaad aaya
yaad aaya bhi mujhe aaj to kya yaad aaya
shaam ke haath ne jis vaqt laga li mehndi
mujhe us vaqt tira rang-e-hina yaad aaya
kahin ankhon ki nami raaz na ifsha kar de
main ne munh pher liya tu jo zara yaad aaya
saare fankar utha laae the shahkaron ko
aur main tha mujhe andaz tira yaad aaya
kitni duniya thi mire gird tujhe kya maalum
badi mushkil se mujhe tera pata yaad aaya
tere daman men nami itni ziyada kyuun hai
kaun sa phuul tujhe bad-e-saba yaad aaya
jab kisi ko koi ummid vafaon ki na thi
mujhe us pal tira paiman-e-vafa yaad aaya
qadam uthte the kahan su-e-haram apne ‘adim’
aaj mushkil nazar aai to khuda yaad aaya
Leave a Reply