Poet
gali kuchon men jab sab jal-bujha ahista ahista
gharon se kuchh dhuan uThta raha ahista ahista
ka.i bechainiyon ki shiddat-e-iz.har ki ḳhatir
mujhe har lafz par rukna paḌa ahista ahista
adam hasti fana aur phir baqa ik da.era sa hai
samajh men aa hi ja.ega ḳhuda ahista ahista
masiha.i ki sub.hon sabr ki raton ke angan men
lahu bahta raha bahta raha ahista ahista
fasil-e-shahr bante hi chale aa.e alam us ke
miri pahchan ka parcham khula ahista ahista
ita.at men bhi tahrim-e-ana ki fikr lazim hai
sar-e-taslim bhi apna jhuka ahista ahista
‘munir’ ahl-e-tahammul ka junun se vasta kya hai
mohabbat jur.a jur.a aur vafa ahista ahista
Leave a Reply