Ishrati Ghar Ki Mohabbat Ka Maza Bhul Gae

‘ishrati’ ghar ki mohabbat ka maza bhuul gae

kha ke london ki hava ahd-e-vafa bhuul gae

pahunche hotel men to phir iid ki parva na rahi

cake ko chakh ke sevaiyon ka maza bhuul gae

bhule maan baap ko aghyar ke charnon men vahan

saya-e-kufr pada nur-e-ḳhuda bhuul gae

mom ki putliyon par aisi tabiat pighli

chaman-e-hind ki pariyon ki ada bhuul gae

kaise kaise dil nazuk ko dukhaya tum ne

ḳhabar-e-faisla-e-roz-e-jaza bhuul gae

buḳhl hai ahl-e-vatan se jo vafa men tum ko

kya buzurgon ki vo sab jud-o-ata bhuul gae

naql maghrib ki tarang aai tumhare dil men

aur ye nukta ki miri asl hai kya bhuul gae

kya taajjub hai jo ladkon ne bhulaya ghar ko

jab ki budhe ravish-e-din-e-ḳhuda bhuul gae

Leave a Comment