Meri Ruswai Ka Yun Jashn Manaya Tumne

Siya Sachdev

meri rusva.i ka yuun jashn manaya tum ne

ret par naam likha aur miTaya tum ne

fikr ki dhuup men jhulsi huun ka.i sadiyon tak

main ne paaya hai tumhen mujh ko na paaya tum ne

main ne jab chaha bhula duun tiri yadon ko tabhi

pyaar ka giit mujhe aa ke sunaya tum ne

ishq ne sudh hi bhula di thi mire tan man ki

TuuT hi jaati magar mujh ko bachaya tum ne

vaqt ne mujh se usi vaqt hansi chhini hai

jab bhi roti hui ankhon ko hansaya tum ne

ehtiyaton ne mire paaon vahin rok liye

jab miri samt kabhi haath baḌhaya tum ne