kaun dekhega bhala is men hai rusvai kya
khvab men aane ki bhi tum ne qasam khaai kya
us ka ghar chhod ke ham to na kisi dar pe gae
par samajhta hai use vo but-e-harjai kya
sunte hi jis ke hui jaan hava tan se mire
is gali se ye khabar bad-e-saba laai kya
vaah main aur na aane ko kahunga tauba
main to hairan huun ye baat aap ne farmai kya
bah chala chashm se yakbar jo ik dariya sa
baithe baithe mujhe kya jaane ye lahr aai kya
harf-e-matlab ko mire sun ke ba-sad-naz kaha
ham samajhte nahin bakta hai to saudai kya
shaikh-ji ham to hain nadan par use aane do
ham bhi puchhenge hui aap ki danai kya
kaifiyat mahfil-e-khuban ki na us bin puchho
us ko dekhun na to phir de mujhe dikhlai kya
aaj dam apna thaharta nahin kya janiye aah
maslahat logon ne vaan baith ke thahrai kya
bar men vo shokh tha aur sair-e-shab-e-mah thi raat
apne ghar kya kahen thi anjuman-arai kya
par gaya subh se vo ghar to yahi dhadka hai
dekhen aaj us ka evaz le shab-e-tanhai kya
dekhne ka jo karun us ke main daava ‘jurat’
mujh men jurat ye kahan aur miri binai kya
Leave a Reply