Diwangi Mein Apna Pata Puchhta Hun Main

Imran Badayuni

divangi men apna pata puchhta huun main

ai ishq is maqam pe to aa gaya huun main

Dar hai ki dam na toḌ duun ghuT ghuT ke ek din

barson se apne jism ke andar paḌa huun main

tufan men jo na bujh sake honge vo aur log

andhi se iḳhtilaf men aksar bujha huun main

lagta hai lauT ja.egi mayus niind phir

masruf us ki yadon men baiTha hua huun main

in hadson se kah de zara sabr to karen

ai ziist teri bazm men bilkul naya huun main

kirdar aadhe mar chuke aadhe palaT ga.e

is vaqt kyuun fasane men laaya gaya huun main

raushan karo mujhe ki zara tirgi haTe

bekar kab se taaq pe rakkha hua huun main

aa aa ke kyuun Thaharti hain mujh men hi ḳhvahishen

hotel huun ya sara.e huun batlao kya huun main

sau baar imtihan zaruri hai kya mira

kaafi nahin hai kah diya tujh se tira huun main

kuchh to chamak dikhe mire ash.ar men mujhe

muddat se sha.eri men lahu thukta huun main