nigah-e-husn-e-mujassam ada ko chhute hi
ganva.e hosh bhi us dilruba ko chhute hi
tamam phuul mahakne lage hain khil khil kar
chaman men shoḳhi-e-bad-e-saba ko chhute hi
masham-e-jan men ajab hai surur ka aalam
tasavvurat men zulf-e-dota ko chhute hi
nigah-e-shauq ki sab ungliyan sulag uTThin
gulab jism ki rangin qaba ko chhute hi
nazar ko hech nazar aa.e sab hasin manzar
bas ik shua-e-ruḳh-e-jan-faza ko chhute hi
jo ansuon se hui ba-vazu akele men
dar-e-qubul khula us dua ko chhute hi
naha.in shiddat-e-ehsas ke ujale men
sama.aten mire soz-e-nava ko chhute hi
hisar-e-zabt jo TuuTa to aankh bhar aa.i
dayar-e-ghair men ik ashna ko chhute hi
lahu men Duub ke kanTe bane charagh ‘zafar’
rah-e-vafa men ham ashufta-pa ko chhute hi
Leave a Reply