Mohsin Zaidi
divar ab kahin na koi dar dikha.i de
charon taraf bas ek samundar dikha.i de
ghar par nazar karun to bayaban sa lage
aur dasht-e-be-kanar mujhe ghar dikha.i de
ḳhvabon ke darmiyan hai muddat se ek jang
maidan-e-kar-zar na lashkar dikha.i de
ye kya ki phir bhi jism hai apna lahu-luhan
aata hua kahin se na patthar dikha.i de
har shaam zindagi ka naya ḳhvab le ke aa.e
har sub.h apni maut ka manzar dikha.i de
is tarah paḌh rahe hain vo tahrir haath ki
hathon men jaise mera muqaddar dikha.i de
tiir o kaman aap bhi ‘mohsin’ sambhaliye
jab dosti ki aaḌ men ḳhanjar dikha.i de
Leave a Reply