yaqin-e-mohkam se kaam lena na darmiyan ehtimal rakhna
samundaron ke safar pe jaana to hausle bhi kamal rakhna
hazar zad-e-safar se baḌh kar vo ek chhoTi si baat Thahri
ba-vaqt-e-ruḳhsat kisi ka kahna safar men apna ḳhayal rakhna
tum apni ḳhatir bacha ke rakhna masarraton ki tamam ghaḌiyan
jahan bhar ki udasiyon ko hamare hisse men Daal rakhna
chaman ko kis ne lahu se sincha gulon se kis ne fareb khaa.e
saval aa.e agar vafa ka to samne ye saval rakhna
gham-e-jahan se nazar bacha ke ham a.enge hal-e-dil sunane
jo ho sake to hamari ḳhatir zara si fursat nikal rakhna
na maslahat se ḳhamosh rahne ke naaz tum ko usuul aa.e
ye kya ki har baat par bigaḌna ye kya ki ik ishti.al rakhna
Leave a Reply