daad milti nazar-e-ahl-e-nazar se pahle
maut aati jo kahin dil ko jigar se pahle
tasfiya karte na hangam-e-sahar se pahle
puchh lete kisi mayus nazar se pahle
mera marna tumhen ho ja.ega ḳhud hi ma.alum
dil taḌap uTThega siine men ḳhabar se pahle
tum to kahte the ki main dard ka qaa.il hi nahin
kaun chiḳha mire nalon ke asar se pahle
naam jis chiiz ka hai maut jahan men mash.hur
vaqi.a ye to hua dard-e-jigar se pahle
aaj ki raat to kuchh ….aur ḳhabar deti hai
ho munasib to chale aana sahar se pahle
ek bijli si miri ankhon ke andar kaundi
aur irada jo hua azm-e-safar se pahle
roi majburiyon par charagaron ki qismat
mar gaya aap ka bimar sahar se pahle
main bhi samjha huun tire naqsh-e-qadam ka matlab
main bhi guzra tha isi rahguzar se pahle
Leave a Reply