Waheed Akhtar
sahraon men dariya bhi safar bhuul gaya hai
miTTi ne samundar ka lahu chuus liya hai
duniya ki malamat ka bhi ab ḳhauf hai dil ko
ḳhashak ne maujon ko giraftar kiya hai
manzil hai na jaada hai na saaya hai na paani
tanha.i ka ehsas faqat rah-numa hai
suraj bhi paḌa rota hai ik gahre kuen men
barson hue akash bhi dhundlaya hua hai
bichhḌe hue ḳhvab aa ke pakaḌ lete hain daman
har rasta parchha.iyon ne rok liya hai
kirnon se tarasha hua ik nuur ka paikar
sharmaya hua ḳhvab ki chaukhaT pe khaḌa hai
phulon se ladi Tahniyan phaila.e hain banhen
ḳhushbu ka badan ḳhaak men pamal paḌa hai
divar-o-dar-e-shahr pe hain ḳhuun ke dhabbe
rangon ka hasin qafila sahra men luTa hai
Leave a Reply