Rahi Fidai
suno to ariza-e-iḳhtilaj rahne do
sukun ke Thiik nahin hain mizaj rahne do
ba-hukm-e-shah taqarib-e-amn kal honge
sharar-gazida hai mahaul aaj rahne do
tum apni nabz ki raftar par nazar rakkho
ḳhilaf-e-gardish-e-nau-ehtijaj rahne do
kisi ko saaya kisi ko gul-o-samar dega
hara bhara hai daraḳht-e-rivaj rahne do
zamin-e-fikr-o-hunar banjh hai abhi ‘rahi’
husul-e-dad vasul-e-ḳhiraj rahne do
Leave a Reply