dil ki taraf nigah-e-taghaful raha kare
is ḳhak-e-rah ko bhi koi kimiya kare
hiire ki kaan dekh ke aata hai ye ḳhayal
kaash is zamin se dana-e-gandum uga kare
TuuTe kisi tarah to dhuen ka siyah tilism
har shaam is dayar men andhi chala kare
dhime dukhon ki raakh badan par mili to hai
vo Daal de nazar to mujhe aa.ina kare
ḳhushbu mire ghamon ki bikhar jaa.e duur duur
yuun chup rahun ki ek zamana suna kare
bujhne lagi hai shaam ke angan men raushni
ab mauj-e-ḳhun-e-dil hi koi mo.ajiza kare
Leave a Reply