Khalid Iqbal Yasir
shah-e-alam ko sar-e-am suna baiTha huun
mere maula tiri chaukhaT se laga baiTha huun
mujhe ma.alum hain adab-e-nashist-o-barḳhast
tire darbar men ik umr uTha baiTha huun
isi mausam ki tamanna thi ka.i barson se
badban kholne the aur gira baiTha huun
bhuul jaana tha jise sabt hai dil par mere
yaad rakhna tha jise us ko bhula baiTha huun
baat kaise main karun aankh mila kar us se
samne jis ke nigahon ko jhuka baiTha huun
vapsi ka koi rasta nahin milta ‘yasir’
kashtiyan apni main pahle hi jala baiTha huun
Leave a Reply