Bazi Pe dil Laga Hai Koi dil-Lagi Nahin

Poet

baazi pe dil laga hai koi dil-lagi nahin

ye bhi hai koi baat kabhi haan kabhi nahin

jis ne kuchh ehtiyat javani men ki nahin

aql-e-salim kahti hai vo aadmi nahin

dil mango to javab hai un ka abhi nahin

goya abhi nahin ka hai matlab kabhi nahin

vaaiz ko laan-taan ki fursat hai kis tarah

puuri abhi khuda ki taraf lau lagi nahin

ashiq par un ka ek zara sa hai iltifat

aur vo bhi is tarah ki kabhi hai kabhi nahin

jaisa ki aap chahte hain shakhs pak-o-saf

aisa to shahr bhar men koi muttaqi nahin

tanha jiye to khaak jiye lutf kya liya

ai khizr ye to zindagi men zindagi nahin

ham sab hain rahgir tasadum ka kya sabab

duniya hai shahrah kuchh aisi gali nahin

dil men nashat aae to chehra ho tabnak

jab tak janab chand nahin chandni nahin

‘parvin’ jalao sham-e-amal gor ke liye

suraj ka nuur chand ke vahan chandni nahin