Siraj Lakhnavi
achchha qisas lena phir ah-e-atishin se
aao idhar pasina to puchh duun jabin se
mera niyaz phir bhi Thukraya ja raha hai
nikli hai rasm-e-sajda go meri hi jabin se
majburi-e-mohabbat insaf chahti hai
shikva bhi hai tumhin se fariyad bhi tumhin se
haan ham bhi jante hain muddat se un buton ko
ka.abe ke rahne vaale nikle hain astin se
suraj ki tez kirnen kaam apna kar rahi hain
baiTha huun munh chhupa.e ik bhigi astin se
vo sang-e-dar salamat ankhon se dekh lena
ik din tulua hoga ik chand isi jabin se
paani ki chadaren hain ḳhushki hai maut un ki
ye ashk paak honge sahil ki astin se
the asman kabhi ham ab to nazar se gir kar
ḳhud apni zindagi men ham mil ga.e zamin se
saara ghurur-e-sajda miTTi men mil raha hai
ik naqsh-e-pa uTha.e uThta nahin jabin se
kyuun huun ‘siraj’ phir ham muhtaj-e-dil-navazi
mil jaa.e mange-ja.che kuchh dard agar kahin se
Leave a Reply