Jigar Jalandhari
dard-e-dil ki dava na ho jaa.e
zindagi be-maza na ho jaa.e
lutf deti hai kya umid-e-vafa
bevafa ba-vafa na ho jaa.e
kaise betab un ko dekhunga
aah yarab rasa na ho jaa.e
dil men hasrat basa to li hai magar
ye kaḌi silsila na ho jaa.e
apni duniya usi se raushan hai
gul charagh-e-vafa na ho jaa.e
ham sitam ko karam samajhte hain
un pe ye raaz va na ho jaa.e
ik zamana hai us ka divana
kahin vo but ḳhuda na ho jaa.e
dil hi sab se baḌa sahara hai
dil kisi se juda na ho jaa.e
tum agar chhu lo apne honTon se
sher mera tira na ho jaa.e
dil luTa kar ‘jigar’ hamari tarah
koi be-asra na ho jaa.e
Leave a Reply