phaila hai jaal baam pe zulf-e-daraz ka
tota uḌe na haath se ahl-e-niyaz ka
dekhi nahin hai tum ne hamari patang abhi
kya naam le rahe ho hava.i-jahaz ka
aamad principal ki hai hoshyar laḌkiyo
ye vaqt hai shaguftan-e-gul-ha-e-naz ka
gōgle laga ke aankh pe chalne lage hasin
vo lutf ab kahan nigah-e-nim-baz ka
piite nahin hain des ke sevak bides ki
chukkaḌ pilao un ko mai-ḳhana-saz ka
ai bahr-e-shauq itna talatum hai narava
mastul gir na jaa.e ḳhirad ke jahaz ka
‘hashim’ vo dekhta jo kisi teddy boy ko
mahmud naam leta na hargiz ayaaz ka
Leave a Reply