akhtar-hoshiyarpuri

Hum Aksar Tirgi Mein Apne Pichhe Chhup Gae Hain

ham aksar tirgi men apne pichhe chhup gae hain

magar jab raston men chand ubhra chal paḌe hain

zamana apni uryani pe ḳhuun roega kab tak

hamen dekho ki apne aap ko oḌhe hue hain

mira bistar kisi fōtpath par ja kar laga do

mire bachche abhi se mujh se tarka mangte hain

buland avaz de kar dekh lo koi to hoga

jo galiyan so gai hain to parinde jagte hain

koi tafsil ham se puchhna ho puchh liije

ki ham bhi aine ke samne barson rahe hain

abhi ai dastan-go dastan kahta chala ja

abhi ham jagte hain jumbish-e-lab dekhte hain

hava apne hi jhonkon ka ta.aqub kar rahi hai

ki uḌte patte phir ankhon se ojhal ho rahe hain

hamen bhi is kahani ka koi kirdar samjho

ki jis men lab pe mohren hain dariche bolte hain

idhar se paniyon ka rela kab ka ja chuka hai

magar bachche daraḳhton se abhi chimTe hue hain

mujhe to chalte rahna hai kisi janib bhi ja.un

ki ‘aḳhtar’ mere qadmon men abhi tak raste hain

More Poems

Leave a Comment