Shahram Sarmadi
main nahin rota huun ab ye aankh roti hai mujhe
roti hai aur sar se paanv tak bhigoti hai mujhe
bad-dua hai jaane kis ki yaad ki jo har ghaḌi
har guzishta lamhe se vahshat si hoti hai mujhe
mumkina had tak main apni dastaras men huun magar
pichhle kuchh din se koi shai mujh men khoti hai mujhe
mutma.in tha din ke bikhrav se main lekin ye raat
dana-dana phir ajab Dhab se piroti hai mujhe
main bahut mashshaq ik tairak tha lekin vo aankh
dekh ab ma.a-kashti-e-jan ke Duboti hai mujhe
Leave a Reply