niind ke raushan baab ki ab bhi gunja.ish hai
ankhon men ik ḳhvab ki ab bhi gunja.ish hai
ganv-numa ghar shahr men laakh banaya lekin
angan dar mehrab ki ab bhi gunja.ish hai
mujh ko dukh dene valon mayus na hona
ankhon men sailab ki ab bhi gunja.ish hai
raat ke daman men raushan hai kitne jugnu
lekin ik mahtab ki ab bhi gunja.ish hai
sahil par aa kar bhi aisa kyon lagta hai
jaise ik girdab ki ab bhi gunja.ish hai
naya zamana ham ko bhi taslim hai lekin
un pichhle adab ki ab bhi gunja.ish hai
chiḳh rahi hai ziist ke dariya ki ḳhamoshi
ik mauj-e-betab ki ab bhi gunja.ish hai
Leave a Reply