Shahab Jafri
su-e-shahr aa.e uḌate parcham-e-sahra ko ham
ai junun ab ke ulaT ke rakh hi den duniya ko ham
tha kahin maazi men to ai haal ab aage tera kaam
le to aa.e teri chaukhaT tak tire farda ko ham
kitne daana hain laga kar aag saare shahr ko
ek ganga le chale jalti hui lanka ko ham
muztarib hain saare sannaTe ki avazen banen
rahbaro daabe hain ik patthar tale sahra ko ham
ḳhaak ka zarra guhar ke mol tha bazar men
jau ke daane ke liye rote hain an-data ko ham
pyaas kah kah kar pukaren biich dariya men khaḌe
paani paani kah ke mangen ret se dariya ko ham
dhuup agar hoti to tan Dhakna kuchh asan tha ‘shahab’
raushni se chhin lete parda-e-saya ko ham
Leave a Reply