Ayaz Rasool Nazki
bhikshu se ḳhvahishat ka ban mangti rahi
kashkol-e-tan men umr tapan mangti rahi
sargoshiyan suni thiin dar-o-bam ne yahan
ḳhali thi charpa.i badan mangti rahi
vo laash apni chhoḌ ke bhaga na jaane kyuun
us ki barahna laash kafan mangti rahi
le kar charagh raat ko phirti thi ḳhamushi
ganjina-e-huruf-e-suḳhan mangti rahi
dekha jo is ne ham ko faraghat se yaan kabhi
qismat hamari ranj-o-mehan mangti rahi
ghaḌiyan Duboin kis ne sar-e-sham phir yahan
do pal sukun ke jo thakan mangti rahi
kis ka na jaane lams samaya lihaf men
rah rah ke raat mujh se badan mangti rahi
ham ne sarab dekhe hazaron sarab men
ik guuna tishnagi thi jo tan mangti rahi
ḳhushbu-libas shaḳhs vo guzra yahan se tha
sahra ki ret mujh se chaman mangti rahi
sarma ki sard tira-o-tarik raat ḳhud
rah rah ke dar pe aag phiran mangti rahi
ḳhud tirgi se sahmi hui shab tamam shab
dast-e-dua uTha.e kiran mangti rahi
paras mani thi naag ke munh men chhupi hui
nagin lipaT lipaT ke vo phan mangti rahi
duniya ne ham ko jaur-o-jafa de diye ‘ayaz’
is daad ke evaz men ye fan mangti rahi
Leave a Reply