Faiz Ul Hasan Khayal
dil jis ka dard-e-ishq ka hamil nahin raha
vo shaḳhs tere pyaar ke qabil nahin raha
jab bhi hina.i hathon se gesu sanvar ga.e
a.ina-e-bahar muqabil nahin raha
har astan se lauT ke aana paḌa use
jo tere dar pe aane ke qabil nahin raha
mahrumiyan hi jis ka muqaddar hain dosto
vo mahfil-e-nashat ke qabil nahin raha
jab tum na the to kuchh bhi nahin tha bahar men
tum aa ga.e to koi muqabil nahin raha
divane tere Duub ga.e gahri niind men
zindan men shor-e-tauq-o-salasil nahin raha
jab aap muskura.e gham-e-dil ki baat par
dil dard ko chhupane ke qabil nahin raha
tanha.iyon ki bazm hi achchhi rahi ‘ḳhayal’
mahfil men pur-sukun kabhi dil nahin raha
Leave a Reply