dayar-e-shahid-e-bilqis-ada se aaya huun
main ik faqir huun shahr-e-saba se aaya huun
jahan-e-nau ki talab aur is ḳharabe men
savad-e-istaḳhr-o-nainva se aaya huun
shab-e-siyah-e-ḳhizan ke sumum-o-sar-sar tak
nigar-ḳhana-e-shub.h-o-saba se aaya huun
abhi kahan hai mujhe nauha-o-nava ka shu.ur
ki ek nahiya-e-be-nava se aaya huun
mire rumuz ka irfan kise nasib ki main
sarosh-e-ruh-e-azal huun sama se aaya huun
damak rahi hai zaman-o-makan ki peshani
sitara-e-abadi huun ḳhala se aaya huun
tumhare ghuncha-o-gul se gharaz nahin mujh ko
idhar ishara-e-bad-e-saba se aaya huun
Leave a Reply