farq jab lazzat-e-ehsas men paaya na gaya
dard dekha na gaya tum ko dikhaya na gaya
chuTkiyan kaun ye rah rah ke liye jaata hai
mere dil men to miri jaan koi aaya na gaya
lutf yuun ranjish-e-be-ja ke liye pahron tak
be-sabab ruThne vaale ko manaya na gaya
ḳhvab-e-pur-kaif ka manzar bhi nashat-avar tha
dost ko is liye kuchh der jagaya na gaya
man.a karti jo rahi ḳhanda-jabini us ki
dard-e-dil apna kabhi us ko sunaya na gaya
ḳhud hansa vo ye javani ki karam-baḳhshi hai
ḳhusrav-e-husn ko mujh se to hansaya na gaya
de to di zabt-e-mohabbat ki qasam zalim ne
fa.eda zabt-e-mohabbat ka bataya na gaya
kab dikhata hai vo barbadi-e-hasrat ka saman
ḳhaak men jab miri hasrat ko milaya na gaya
raushni jis ki dikhati thi mujhe bhuul hi bhuul
us qamar-vash ka vo andaz bhulaya na gaya
tuur ki puuri tarah yaad dila.i na ga.i
hosh chhine to ga.e hosh men laaya na gaya
un ki mashkuk nazar men vo maza tha manzur
ki yaqin apni mohabbat ka dilaya na gaya
Leave a Reply