khub-ruyan-e-jahan chand ki tanviren hain
putliyan ankhon ki raushan hon vo tasviren hain
sher-goyon ko mazamin ki tauqiren hain
kahne ko ek zamin saikdon jagiren hain
yaar se hoti hai gustakh jo hoti ho so ho
zulfen hathon men hain ya paanv men zanjiren hain
koi adab-e-mohabbat ko bhala kya jaae
zillaten jitni hain ashiq ki vo tauqiren hain
karun tauba jo ho paida bun-e-har-mu se zaban
jitne hain mu-e-badan utni hi taqsiren hain
vo bhaven maar utarenge kisi din mujh ko
jin ke qabze men qaza hai ye vo shamshiren hain
qaul-e-haq par hue kab muttafiq ahl-e-duniya
ek quran hai jis ki kai tafsiren hain
kya yaqin aae mujhe hal-e-bahisht-o-dozakh
main huun jis khvab men sab us ki ye taabiren hain
saat dozakh kiye khalq us ne karimi us ki
ek hafte ki hamare liye taaziren hain
chaar inten huiin kis ke na mahall-e-nakhvat
maqbare aaj salatin ki tamiren hain
ek zarre ko jo qismat se na jumbish ho na ho
khaak udane ko to andhi miri tadbiren hain
koi khush-khvan ho qasid to bahut behtar hai
mere naame men tarane ki bhi tahriren hain
haddiyan jism men jalti hain palite ki tarah
ishq ke ism-e-jalali ki ye tasiren hain
dil ko har-vaqt jo rahti hai buton ki tasbih
apne nalon ko samajhta huun ki takbiren hain
‘bahr’ arzhang-e-jahan ka na tamashai ho
jin ka saaya hai bala us men vo tasviren hain