ye zindagi ke tajrabat qimti hain bahut
tumhare paak ḳhayalat qimti hain bahut
likhe the ham ne jo ashkon ki raushna.i se
vo ishq ke bhi maqalat qimti hain bahut
inhi se hoti hai me.araj ishq ko hasil
ye dard aur ye jazbat qimti hain bahut
nisab-e-ishq men puchhe ga.e hain jo aksar
javab chhoḌo savalat qimti hain bahut
hamare jiine ki Dharas yahi bandhati hain
tumhari yadon ki barat qimti hain bahut
vo jis ke ḳhvab men didar un ka ho jaa.e
qasam ḳhuda ki vahi raat qimti hai bahut
vo bol de to sabhi kuchh luTa ke ham rakh den
ye sach hai in ki har ik baat qimti hai bahut
hamare ashk yahan haisiyat nahin rakhte
tumhare ashkon ki saughat qimti hai bahut
vo lamhe jin men hamen yaad aap aa jaa.e
vahi hayat ke lamhat qimti hain bahut
ye jab bhi aate hain ashkon ko saath laate hain
ye ashk aur ye barsat qimti hain bahut
har ik safhe pe tera naam likh diya ‘haidar’
isi liye mire safhat qimti hain bahut
Leave a Reply