Kiraya-dar

Geetanjali Rai

are aao

be-fikr ho ke aao

meri zindagi men

ghabrao nahin

koi tut-phut nahin hogi tum se

aao to

dar-asl yahan kuchh baaqi hi nahin tutne ko

haan kuchh purane khvabon ki kirchen hain

tumhare aane tak saaf ho jaengi

us ke baad jo hoga sab tumhara hi hoga

jaate vaqt jo kuchh salamat bache

le jaana

khvabon ki kirchen gar rah gaiin tumhare baad to samet ke rakh dena mere honthon pe

muskurahaton men bandh ke