labon pe harf-e-rajaz hai zirah utaar ke bhi
main jashn-e-fat.h manata huun jang haar ke bhi
use lubha na saka mere ba.ad ka mausam
bahut udaas laga ḳhal-o-ḳhad sanvar ke bhi
ab ek pal ka taghaful bhi sah nahin sakte
ham ahl-e-dil kabhi aadi the intizar ke bhi
vo lamha bhar ki kahani ki umr bhar men kahi
abhi to ḳhud se taqaze the iḳhtisar ke bhi
zamin oḌh li ham ne pahunch ke manzil par
ki ham pe qarz the kuchh gard-e-rahguzar ke bhi
mujhe na sun mire be-shakl ab dikha.i to de
main thak gaya huun faza men tujhe pukar ke bhi
miri dua ko palaTna tha phir udhar ‘mohsin’
bahut ujaaḌ the manzar ufuq se paar ke bhi
Leave a Reply