pa-shikaston ko jab jab milenge aap
sar-e-rah-e-talab milenge aap
un se pucha ki kab milenge aap
bole jab jan-ba-lab milenge aap
dil ye kah kar ḳhabar ko us ki chala
mujh ko zinda na ab milenge aap
arsa-e-hashr id-gah hua
sab se mil lenge jab milenge aap
vasl men bhi jabin pe hogi shikan
toḌne ko ghazab milenge aap
be-ḳhudon ko talash se kya kaam
har jagah be-talab milenge aap
chhoḌ di ruḳh pe zulf samjhe ham
chhup ke ek aadh shab milenge aap
chheḌ mutrib tarana-e-shab-e-vasl
saz-e-aish-o-tarab milenge aap
yaar jab mil gaya to ham se ‘jalal’
jo na milte the sab milenge aap
Leave a Reply