Ishq Maine Likh Dala Qaumiyat Ke KHane Mein

ishq maiñ ne likh Daalā qaumiyat ke ḳhāne meñ

aur terā dil likhā shahriyat ke ḳhāne meñ

mujh ko tajraboñ ne hī baap ban ke paalā hai

sochtā huuñ kyā likhūñ valdiyat ke ḳhāne meñ

merā saath detī hai mere saath rahtī hai

maiñ ne likhā tanhā.ī zaujiyat ke ḳhāne meñ

dostoñ se jā kar jab mashvara kiyā to phir

maiñ ne kuchh nahīñ likhā haisiyat ke ḳhāne meñ

imtihāñ mohabbat kā paas kar liyā maiñ ne

ab yahī maiñ likhūñgā ahliyat ke ḳhāne meñ

jab se aap mere haiñ faḳhr se maiñ likhtā huuñ

naam aap kā apnī milkiyat ke ḳhāne meñ

Leave a Comment