ishq main ne likh Daala qaumiyat ke ḳhane men
aur tera dil likha shahriyat ke ḳhane men
mujh ko tajrabon ne hi baap ban ke paala hai
sochta huun kya likhun valdiyat ke ḳhane men
mera saath deti hai mere saath rahti hai
main ne likha tanha.i zaujiyat ke ḳhane men
doston se ja kar jab mashvara kiya to phir
main ne kuchh nahin likha haisiyat ke ḳhane men
imtihan mohabbat ka paas kar liya main ne
ab yahi main likhunga ahliyat ke ḳhane men
jab se aap mere hain faḳhr se main likhta huun
naam aap ka apni milkiyat ke ḳhane men
Leave a Reply