ik sukut-e-bekaran sho.ala-bayani se alag
ek duniya hai mire shahr-e-ma.ani se alag
mauj ḳhud sakit khaḌi thi ya ki tha ye dam-e-ab
kya tha vo Thahrav sa paiham ravani se alag
vo bayan ahang jis ka dil ko chhalni kar gaya
garm-guftari se haT kar be-zabani se alag
saari ḳhushiyan jhuuT hain har muskurahaT hai fareb
aao ik duniya basa.en shadmani se alag
main bhi apni zaat ke haibat-kade men huun asiir
vo bhi ruh-e-muztarib qaid-e-makani se alag
rabt-e-baham par na tha harf-e-tasalsul ka murad
ya.ani har kirdar tha dil ki kahani se alag
aur kitna roi.ega yaad kar ‘azad’ ko
ek din hona hi tha is dar-e-fani se alag
Leave a Reply