Rahi Fidai
vaqt ke intizar men vo hai
justuju-e-shikar men vo hai
sina-e-razdar hi men nahin
dida-e-ashkar men vo hai
a.ina saaf ho to dekh use
naqsha-e-dil-figar men vo hai
us ke qabze men ka.enat sahi
fuqara ki qatar men vo hai
sar pe dastar-e-fazl hai lekin
jubba-e-tar-tar men vo hai
be-karan zehn o dil ki hai vus.at
jism-o-jan ke hisar men vo hai
us ki charon taraf kitaben hain
halqa-e-gham-gusar men vo hai
pesh-e-zalim sada-e-haq yaani
nargha-e-sad-hazar men vo hai
qila-e-be-basar men tum mahfuz
ḳhud-kalami ke ghaar men vo hai
ḳhaak tum pa sakoge ḳhaak use
aab o baad o sharar men vo hai
lamha-ha-e-sukun men us ki talash
sa.at-e-iztirar men vo hai
pairvi us ki hai abas ‘rahi’
ḳhud hi rah-e-farar men vo hai
Leave a Reply