Tabiat-E-Be-Niyaz-E-Josh-E-Wahshat Ho to Sakti Hai

Maikash Badayuni

tabi.at-e-be-niyaz-e-josh-e-vahshat ho to sakti hai

jo tum chaho to behtar meri halat ho to sakti hai

vo dil lene chale hain ik nigah-e-naz ke badle

chalo us jins ki bhi koi qimat ho to sakti hai

nahin ahl-e-vafa ki qadr teri bazm men lekin

kabhi in sarfaroshon ki zarurat ho to sakti hai

dua.en mangte the sub.h-e-nau ki ye na socha tha

kabhi sub.h-e-vatan bhi sham-e-ghurbat ho to sakti hai

ye maana karobar-e-zindagi qaa.em hai nafrat par

magar insan ko insan se mohabbat ho to sakti hai

ye main ne kab kaha meri tarah tum ko mohabbat hai

magar meri tarah tum ko mohabbat ho to sakti hai

chale hain ruuTh kar kuchh rind mai-ḳhane se ai ‘maikash’

yahi azurdagi azm-e-baghavat ho to sakti hai