ankhen bhi maand thiin mira dil bhi figar tha
haa.e vo shaḳhs jis ka mujhe intizar tha
mansub umr-e-rafta ye e.azaz kam nahin
ik shaḳhs muntaha-e-gham-e-e’tibar tha
jab ghair ke liye na raha tera lams-e-ghair
phir tera intizar bhi ankhon pe baar tha
tarikiyan nasib thiin isyan-e-zist ko
raushan jo tha vo meri vafa ka hisar tha
pahle-pahal jo rabt tha jannat sa apne beach
phir ye khula vo ishq na tha kar-zar tha
phir yuun hua ki us ne bhula hi diya mujhe
karta bhi kya gila main use iḳhtiyar tha
‘afaq’ vo juda bhi hua tha to zo.am se
phir us ko yaad karna bhi ik shahkar tha
Leave a Reply