lamha lamha sochne vaali ankhen thiin
us ki ankhen dekhne vaali ankhen thiin
ka.i dinon se un ko DhunD rahi huun main
vo jo mujh ko DhunDne vaali ankhen thiin
us ko bhulun bhi to kaise bhulun main
hanste hanste rone vaali ankhen thiin
idhar udhar kab dekhne deti thiin mujh ko
har pal mujh ko Tokne vaali ankhen thiin
mujh ko ḳhud se duur na jaane deti thiin
mera rasta rokne vaali ankhen thiin
apne aap men ek paheli thi ‘sadi’
aur paheli bujhne vaali ankhen thiin
Leave a Reply