Najeeb Ahmad
thakan se chuur badan dhuul men aTa sar tha
main jab gira to mire samne mira ghar tha
tahi-e-samar shajar-e-ḳhvab kuchh niDhal se the
zamin pe sukhi hui pattiyon ka bistar tha
usi ki aab thi us shab men raushni ki lakir
vo ek shaḳhs ki jo kanch se bhi kam-tar tha
nahin ki gard hain saat asman hi gardish men
zamin ki tarah mire paanv men bhi chakkar tha
main aaj bhi usi basti men ji raha huun jahan
kisi ke haath men ḳhanjar kisi ke patthar tha
baḌha ke haath ḳhizan ki ruton ne noch liya
hava ke jism pe jo ḳhushbuon ka zevar tha
saron pe abr-kusha dhuup ki tamazat thi
‘najib’ zer-e-qadam ret ka samundar tha
Leave a Reply