aapas men koi rabt ka imkan bhi na tha
donon taraf ye marhala asan bhi na tha
charagaron ki pursish-e-paiham ke bavajud
main mutma.in na tha to pareshan bhi na tha
pahlu badal badal ke vo karta tha guftugu
main sab samajh raha tha ki anjan bhi na tha
baat us ki dil men mere utarti chali ga.i
vo ajnabi tha aur mira mehman bhi na tha
kyuun mujh ko mezbani ka mauqa na mil saka
main is qadar to be-sar-o-saman bhi na tha
vo kitna sard-mehr tha malum ho gaya
va.ada-ḳhilaf ho ke pasheman bhi na tha
‘kausar’ amir-e-shahr se milne men uzr kyuun
kuchh fa.eda nahin tha to nuqsan bhi na tha
Leave a Reply