hain vaqt ke mahkum to bahkenge qadam aur
badle hue halat men kho ja.enge ham aur
afsana-e-andoh men yaksan hai har ik shaḳhs
is daur-e-pur-ashob men tum aur na ham aur
le jaate hain but-ḳhane se dil apna jala kar
rakh lenge na.i sham.a sar-e-taq-e-haram aur
har shaḳhs tha ḳhamosh mire ba.ad azal men
puchha jo gaya hai koi sha.ista-e-gham aur
sanche men masarrat ke Dhala hai gham-e-ulfat
ai gardish-e-afaq mujhe de koi gham aur
avval to bichhaḌte hi chale jaate hain sathi
paḌta hai bura vaqt to ho jaate hain kam aur
halat muafiq nazar aate nahin ‘qaisar’
hain tarkash-e-ayyam men kuchh tir-e-sitam aur
Leave a Reply