Hathon Ka Tarana

in hathon ki taazim karo

in hathon ki takrim karo

duniya ke chalane vaale hain

in hathon ko taslim karo

tarikh ke aur mashinon ke pahiyon ki ravani in se hai

tahzib ki aur tamaddun ki bharpur javani in se hai

duniya ka fasana in se hai, insan ki kahani in se hai

in hathon ki taazim karo

sadiyon se guzar kar aae hain, ye nek aur bad ko jante hain

ye dost hain saare aalam ke, par dushman ko pahchante hain

khud shakti ka autar hain, ye kab ghair ki shakti mante hain

in hathon ko taazim karo

ek zakhm hamare hathon ke, ye phuul jo hain gul-danon men

sukhe hue pyase chullu the, jo jaam hain ab mai-khanon men

tuuti hui sau angdaiyon ki mehraben hain aivanon men

in hathon ki taazim karo

rahon ki sunahri raushniyan, bijli ke jo phaile daman men

fanus hasin aivanon ke, jo rang-o-nur ke khirman men

ye haath hamare jalte hain, ye haath hamare raushan hain

in hathon ki taazim karo

khamosh hain ye khamoshi se, so barbat-o-chang banate hain

taron men raag sulate hain, tablon men bol chhupate hain

jab saaz men jumbish hoti hai, tab haath hamare gaate hain

in hathon ki taazim karo

eajaz hai ye in hathon kaa, resham ko chuen to anchal hai

patthar ko chuen to but kar den, kalakh ko chuen to kajal hai

mitti ko chuen to sona hai, chandi ko chuen to payal hai

in hathon ki taazim karo

bahti hui bijli ki lahren, simte hue ganga ke dhare

dharti ke muqaddar ke malik, mehnat ke ufuq ke sayyare

ye charagaran-e-dard-e-jahan, sadiyon se magar khud bechare

in hathon ki taazim karo

takhliq ye soz-e-mehnat kii, aur fitrat ke shahkar bhi hain

maidan-e-amal men lekin khud, ye khaliq bhi meamar bhi hain

phulon se bhari ye shakh bhi hain aur chalti hui talvar bhi hain

in hathon ki taazim karo

ye haath na huun to mohmal sab, tahriren aur taqriren hain

ye haath na hon to be-maani insanon ki taqriren hain

sab hikmat-o-danish ilm-o-hunar in hathon ki tafsiren hain

in hathon ki taazim karo

ye kitne subuk aur nazuk hain, ye kitne siDaul aur achchhe hain

chalaki men ustad hain ye aur bhole-pan men bachche hain

is jhuut ki gandi duniya men bas haath hamare sachche hain

in hathon ki taazim karo

ye sarhad sarhad judte hain aur mulkon mulkon jaate hain

banhon men banhen Dalte hain aur dil se dil ko milate hain

phir zulm-o-sitam ke pairon ki zanjir-e-giran ban jaate hain

in hathon ki taazim karo

taamir to in ki fitrat hai, ik aur nai taamir sahi

ik aur nai tadbir sahi, ik aur nai taqdir sahi

ik shokh o hasin khvab aur sahi ik shokh o hasin taabir sahi

in hathon ki taazim karo

in hathon ki takrim karo

duniya ko chalane vaale hain

in hathon ko taslim kara

Leave a Comment