ai ham-safir talḳhi-e-tarz-e-bayan na chhoḌ
tu galiyan diye ja hamen galiyan na chhoḌ
vaa.iz buton ke chah-e-zaqan ka bayan na chhoḌ
varna kahin na pa.ega paani kuaan na chhoḌ
pahuncha de makr-o-kaidd ko hadd-e-kamal tak
ai dost na-tamam koi dastan na chhoḌ
in rahbaran-e-qaum se ya-rab bacha mujhe
char lengi sab chaman mira ye bakriyan na chhoḌ
phulon se bhar sake na agar daman-e-havas
sehn-e-chaman ki ghaas bhi ai baghban na chhoḌ
be-vasvasa gharibon pe bhi haath saaf kar
mil jaa.en to javar ki bhi roTiyan na chhoḌ
divanon ke to jaib o gireban ka zikr kya
gar dhajjiyan bhi haath lagen mehrban na chhoḌ
insaniyat men baaqi hai saffak dam abhi
ik haath kas ke aur use nim-jan na chhoḌ
zalim usi ne naak men dam kar diya tira
ragḌe ja ḳhuub gardan-e-amn-o-aman na chhoḌ
ab zulm men izafa na kar bani-e-jafa
qasr-e-sitam ke aage koi sa.eban na chhoḌ
ranj-o-alam ka za.iqa ik roz tu bhi chakh
ye ḳhaas jaunpur ki tu muliyan na chhoḌ
ai ‘shauq’ ye jafa.en hain kya ye sitam hain kya
har imtihan men baiTh koi imtihan na chhoḌ
Leave a Reply