Zulfiqar Aadil
shukr kiya hai in peḌon ne sabr ki aadat Daali hai
is manzar se dekho barish hone vaali hai
socha ye tha vaqt mila to TuuTi chizen joḌenge
ab kone men Dher laga hai baaqi kamra ḳhali hai
baiThe baiThe phenk diya hai atish-dan men kya kya kuchh
mausam itna sard nahin tha jitni aag jala li hai
apni marzi se sab chizen ghumti phirti rahti hain
be-tartibi ne is ghar men itni jagah bana li hai
der se qufl paḌa darvaza ik divar hi lagta tha
us par ek khule darvaze ki tasvir laga li hai
har hasrat par ek girah si paḌ jaati thi siine men
rafta rafta sab ne mil kar dil si shakl bana li hai
uupar sab kuchh jal ja.ega kaun madad ko aa.ega
jis manzil par aag lagi hai sab se niche vaali hai
ik kamra sayon se bhara hai ik kamra avazon se
angan men kuchh ḳhvab paḌe hain vaise ye ghar ḳhali hai
pairon ko to dasht bhi kam hai sar ko dasht-navardi bhi
‘adil’ ham se chadar jitni phail saki phaila li hai
Leave a Reply