Tauqeer Taqi
pari uḌ ja.egi aur rajdhani ḳhatm hogi
ye ankhen band hote hi kahani ḳhatm hogi
kisi sanduq men dimak-zada ḳhat dekhte hi
kaha dil ne ab us ki har nishani ḳhatm hogi
use ye shauq gahri dhund lipTe har shajar se
mujhe ye fikr kaise bad-gumani ḳhatm hogi
ḳhabar kab thi tilism aisa hai is bhigi nazar men
yakayak jism se ḳhuun ki ravani ḳhatm hogi
zamin par asman hote parinde jaan lenge
sitaron par bhi aḳhir hukmarani ḳhatm hogi
hamari raah men baiThegi kab tak teri duniya
kabhi to is zuleḳha ki javani ḳhatm hogi
ḳhuda jaane kahan TuuTe masafat ka tasalsul
par itna jante hain be-makani ḳhatm hogi
Leave a Reply