Qamar Iqbal
sab pighal jaa.e tamasha vo idhar kab hoga
mom ke shahr se suraj ka guzar kab hoga
ḳhvab kaghaz ke safine hain bacha.en kaise
ḳhatm is aag ke dariya ka safar kab hoga
jis ka naqsha hai mire zehn men ik muddat se
ghar vo tamir se pahle hi khanDar kab hoga
mere kho.e hue mahvar pe jo pahuncha.e mujhe
ab lahu men mire paida vo bhanvar kab hoga
sabz rakkha hai jise main ne lahu de ke ‘qamar’
mehrban dhuup men aḳhir vo shajar kab hoga
Leave a Reply